Санжар Абдуллаев, Давлат хизматлари департаменти бошлиғи:
— “Ҳеч бир шахс ҳужжатсиз қолмайди” ҳуқуқий акцияси эълон қилингандан сўнг, Республика миқёсида жами 9 209 та маҳаллаларда хатлов ўтказилиб 98 192 нафар шахсларда тегишли ҳужжатлар мавжуд эмаслиги аниқланди. Айни чоғда 88 570 фуқаро муаммоси ижобиий ҳал этилди, қолган ҳолатлар ўрганиб чиқилмоқда. Фуқаронинг ўзлигини намаён этиши, фуқаронинг ҳуқуқларининг бузилмаслиги учун ҳам ҳужжат керак. Акс ҳолда унинг таълим олиши,бурчини бажариши ҳам қийинлашади. Акция давомида ҳатто 92 ёшли фуқароларга ҳам ID карталар берилди. Йўқолган ҳужжатларни тиклаш масаласи қийин кечганлиги боис ҳам кўплаб фуқаролар ҳужжатсиз юрган. Туғилганлик ҳақидаги гувоҳномаси йўқ бўлган фуқароларга ҳужжатига аниқлик киритиш мақсадида, Соғлиқни сақлаш вазирлиги архив материалларига мурожаат қилдик. Бу орқали топилмаган ҳолатларда Адлия номидан судга мурожаат қилиш орқали ҳужжатларни тикладик. Наманган вилоятида 1994 йилда туғилган фуқаронинг туғилганлик ҳақидаги гувоҳномаси йўқ бўлганлиги учун шу пайтгача таълим ололмаган. Бу ҳолатга ўхшашларидан яна минглаб келтириш мумкин.

Тадбирда ishonch.uz мухбири савол билан мурожаат қилди:

— Гарчи ватанимизда кўп йиллардан бери яшаётган бўлсада, Ўзбекистон фуқаролигини ололмаётган юртдошларимиз талайгина. Акция давомида уларнинг ҳам мурожаатлари қаноатлантирилдими?

— Фуқаролик бериш масаласи жуда мураккаб жараён. У асосан Ички ишлар вазирлиги ваколатига киради. “Ҳеч бир шахс ҳужжатсиз қолмайди” ҳуқуқий акцияси доирасида фуқаролик беришни мўлжалламаганмиз.

Вазирлик берган маълумотларга кўра, салкам бир ойда 1 261 нафар шахснинг туғилиши қайд этиб берилди;

9 450 нафар шахсга туғилганлик ҳақида такрорий гувоҳнома берилди;
6 503 та қонуний никоҳдан ўтмасдан бирга яшаётган шахсларнинг никоҳи қайд этилди;
2 593 нафар шахснинг ўлими муддати ўтиб қайд этилди;
3 429 нафар шахснинг ўлими ҳақида такрорий гувоҳнома берилди;
7 973 нафар фуқарога ID-карта расмийлаштирилди;
23 274 та тадбиркорлик субъектлари давлат рўйхатидан ўтказилди;
17 865 та кўчмас мулк объектлари давлат рўйхатидан ўтказилди.