Тасодифий ихтиро

Пакетчали чойлар илк бор 1908 йилда АҚШда пайдо бўлган. Бу маҳсулот Томас Салливан исмли Ню-Йорклик чой савдогари томонидан тасодифан ихтиро қилинган. У ўз мижозларига чой намуналарини матодан тикилган кичик қопчалар ичида юборар эди. Мижозлар эса ушбу қопчаларни сувга солиб, чой дамлашни қулай деб топишарди. Шу тариқа чой кичик пакетларда сотила бошлади ва тез орада оммалашди. 1940 йилларда эса, пакетчали чойлар янада такомиллашиб, чой саноатида кенг ишлаб чиқарила бошланди. Пакетлар аввал матодан, кейинчалик фильтр қоғозидан тайёрлана бошланди. Бугунги кунга келиб, пакетчали чойлар бутун дунё бўйлаб машҳур ва қулай маҳсулотга айланган.

Чойларнинг турлари

Бугунги кунда бу чойлар кенг турдаги таъмлар билан таклиф этилади: мевали, зираворли, ўтли ва ҳатто шифобахш ўсимликлардан тайёрланган аралашмалар мавжуд. Аҳоли соғлом турмуш тарзига эътибор бераётгани сабабли, органик ва кимёвий ишлов берилмаган пакетчали чойлар оммалашиб бормоқда. Ҳозирда чой пакетлари қоғоз, ипак, ва табиий толалардан тайёрланади, бу эса пакетларнинг сувда зарарли модда чиқаришининг олдини олади. Европа ва Америка каби мамлакатларда пластик аралашмалари бўлган пакетлар ўрнига экологик хавфсиз пакетлардан фойдаланишга ўтиш жараёни кузатилмоқда.

Пакетчали чойлар инсон учун зарарлими?

Бундай чойлар инсон соғлиғига катта хавф туғдирмайди, аммо уларнинг зарарли жиҳатлари ҳам бор. Бу жиҳатлар кўпроқ пакет материали ва қўшимча ишлов бериш усулларига боғлиқ бўлиб, улар узоқ муддатда салбий таъсир кўрсатади. Баъзи пакетчали чойлар пластик аралашмалар қўшилган материаллардан тайёрланади, бу эса қайноқ сувда микропластиклар ажралиб чиқишига олиб келади. Узоқ муддатда микропластикларнинг организмда тўпланиши яллиғланиш ва бошқа муаммоларга сабаб бўлиши мумкин. Баъзи ишлаб чиқарувчилар чойнинг хушбўй ҳиди ёки таъмини яхшилаш учун кимёвий қўшимчалар қўшишади. Улар ҳаддан зиёд истеъмол қилинса, соғлиқ учун зарарли, айниқса узоқ муддат давомида истеъмол қилинса.

Сифатли чой барглари ўрнига қолдиқлар...

Кўпинча сифатли чой барглари ўрнига майдаланган қолдиқлар ишлатилади. Бу чойнинг фойдали моддалари камайганлигини англатади. Шунингдек, майдаланиб қолган чойларда танин ва кофеин кўпроқ бўлиши мумкин, бу эса асабийлик, уйқусизлик каби муаммоларни келтириб чиқаради. Баъзи пластик асосли пакетлар иссиқлик билан реакцияга киришиб, зарарли моддаларни сувга чиқариши мумкин. Шу сабабли, экологик хавфсиз материаллардан тайёрланган пакетчаларни танлаш тавсия этилади.

Агар юқори сифатли, органик ва пластик аралашмасиз пакетчали чойларни танласангиз, соғлиқ учун хавфли таъсирларни камайтириш мумкин. Ҳар куни бир-икки стакан пакетчали чой ичиш одатда зарарли эмас, аммо ҳаддан ташқари истеъмолдан сақланиш мақсадга мувофиқдир.