Prezidentning tegishli qarori loyihasi bilan “O'zyog'moysanoat” uyushmasi negizida, uning huquqiy vorisi bo'lgan “Oziqovqatsanoat” uyushmasini tashkil etish taklif qilinyapti.

Bunda, Uyushmaning tarkibi unga ixtiyoriy a'zo bo'lgan yog'-moy, un-yorma, non-makaron, go'sht-sut va konserva sanoati, qandolat mahsulotlari, salqinlatuvchi va alkogolsiz ichimliklar hamda boshqa oziq-ovqat ishlab chiqaruvchi va ko'makdosh-ta'minotchi korxonalardan tashkil topadi.

Shuningdek, Uyushma ijro etuvchi apparatining tuzilmasini tasdiqlash, uyushma raisi va uning o'rinbosarlarini saylash Ta'sischilar umumiy yig'ilishi qarori bilan amalga oshiriladi.

Uyushmani saqlash va faoliyatini moliyalashtirish uning tarkibiga kirgan korxonalarning a'zolik badallari, Savdo-sanoat palatasining Tarmoqlarni qo'llab-quvvatlash jamg'armasi mablag'lari hamda qonun hujjatlarida taqiqlanmagan boshqa manbalar hisobidan amalga oshiriladi.

Respublika oziq-ovqat sanoati korxonalarini yagona milliy brend ostida siyosat yurituvchi tizimga birlashtirish hamda korxonalar tomonidan ishlab chiqarilgan mahsulotlarni ichki va tashqi bozorlarga keng targ'ib qilish, marketing tadqiqotlarini olib borish va yangi bozorlarni topishda korxonalarga ko'maklashish kabi qator maqsadlar Uyushma faoliyatining ustuvor yo'nalishlari etib belgilanmoqda.