Шу йилнинг 28 февраль – 6 март кунлари Таиланд пойтахти Бангкок шаҳрида бўлиб ўтган U-18 ёш тоифасидаги хоккейчилар ўртасидаги жаҳон чемпионатида Ўзбекистон касаба уюшмалари Федерациясининг хоккей мактаби тарбияланувчиларидан ташкил топган терма жамоамиз муносиб қатнашиб, Ватанимизга ёруғ юз билан қайтди.

Ушбу мусобақада терма жамоамиз Жанубий Африка республикаси термасини 12:0, Люксембургни 12:1, Туркманистонни 8:2, Босния ва Герцеговинани 11:3 ва Таиланд терма жамоасини 3:2 ҳисобида енгди.

Шунга кўра, ўз гуруҳида юз фоизлик натижани қайд этган хоккейчиларимиз келаси мавсумда U-18 жаҳон чемпионатида III дивизионнинг «А» гуруҳида иштирок этиш ҳуқуқини қўлга киритдилар.

Ўзбекистон касаба уюшмалари Федерациясида хоккей жамоаси мураббий ва спортчиларини тақдирлаш маросими бўлиб ўтди. Тадбирни Ўзбекистон касаба уюшмалари Федерацияси раиси Қудратилла Рафиқов олиб борди.

– Ҳурматли мураббийлар ва ёш спортчиларимиз, – деб бошлади ўз сўзини Қудратилла Рафиқов. – Аввало, сизларни ушбу ғалаба билан чин қалбимдан табриклайман. Сиз хоккей бўйича юртимиз спорти тарихида янги саҳифа очдингиз. Бутун дунё аҳли, қолаверса, катта иштиёқ билан сизни кузатиб турган юртдошларимиз маҳорат намоён этганингизга гувоҳ бўлди. Ҳар бир учрашувда юқори устунликка эришганингизга ҳайрат ва ҳавас билан боқдилар.

Бунинг замирида муҳтарам Президентимиз Шавкат Мирзиёев раҳнамолигида Янги Ўзбекистонимизда профессионал спортчиларни тайёрлаш бўйича олиб борилаётган кенг кўламли ислоҳотлар ётибди, десак, адашмаймиз. «Ҳумо Арена» муз саройи қурилгани кўп ўтмай ўз самарасини беряпти. Бунга сизларнинг натижангизни бемалол мисол қилиб айтишимиз мумкин.

Қ.Рафиқов Ўзбекистон касаба уюшмалари Федерацияси бундан кейин ҳам хоккейчиларни қўллаб-қувватлашда давом этишини, уларнинг ютуғи бутун юртимиз аҳли қалбини фахр ва ифтихорга тўлдирганини таъкидлади. Қолаверса, ёш хоккейчиларнинг жаҳон чемпионатида эришган улкан ғалабаси Ўзбекистон касаба уюшмалари ҳаракатининг 120 йиллик шодиёнасига муносиб совға бўлганини ҳам эътироф этиб ўтди.

Шундан сўнг ёш спортчилар ва уларнинг мураббийларига пул мукофотлари ҳамда махсус табрикномалар топширилди.

– Хоккейчида кўплаб хислатлар бўлиши керак, – дейди спортчилар мураббийи Абдумажид Носиров. – У тезкор, ақлли, услубий жиҳатдан тез қарор чиқариш қобилиятларини ўзида бирлаштирган бўлиши лозим. Ҳозир «Ҳумо Арена» муз саройида 100 нафардан ошиқ ёшларимиз шуғулланаётган бўлса, улар орасида умидли, иқтидорлилари анчагина. Апрель ойида Арманистонда катталар ўртасида жаҳон чемпионати бўлиб ўтади. Айни дамларда ушбу мусобақага ҳам қизғин тайёргарлик кўряпмиз. Таиланддаги U-18 жаҳон чемпионатида III дивизионнинг «А» гуруҳида иштирок этиш ҳуқуқини қўлга киритдик. Келгуси мақсадларимиз ушбу натижаларни босқичма-босқич юксалтириш бўлади. Кўрсатилаётган эътибор ва яратилган шароитлар учун давлатимиз раҳбарига барча хоккейчиларимиз номидан миннатдорлик билдираман. Насиб қилса, йигитларимиз янги марраларни забт этиш йўлида янада кўпроқ меҳнат қилишади.

Тадбирда касаба уюшмалари фаоллари ҳам сўзга чиқиб, Ўзбекистон терма жамоаси сардори Жасурбек рустамхоновнинг 5 ўйинда 22 очко (14 гол + 8 ассист) жамғариб, турнирнинг «Энг яхши ўйинчиси», «Энг яхши ҳужумчиси» ва Рустам Эргашевнинг «Энг яхши дарвозабон» деб тан олинганига ҳам алоҳида эътибор қаратишди ҳамда ёш спортчиларга омад тилашди.

Зебо Намозова

ishonch.uz