Кунлар анча исиб қолди. Ҳадемай ёз эшик қоқади. Иссиқ ҳароратли кунларда организмнинг суюқлик балансини ушлаб туриш учун тез -тез ичимлик ичишга эҳтиёж сезамиз. Жазирамада энг яхши ичимлик тоза сувдир. Мутахассисларнинг фикрича, сув истеъмолида унинг миқдори билан бирга ҳарорати ҳам тана учун муҳим. Масалан, 36-37 даражали тоза ичимлик суви организмда метоболизм ва ичак фаолиятини яхшилаб, қондаги холестерин миқдорини пасайтиради, шунингдек, танадан токсинларни чиқариб юборади.

Мавсумнинг ўзига хос бошқа чанқоқбости ичимликлари ҳам талайгина. Хусусан, яшил ёки ўсимлик чойлари, мойчечак, ялпиз дамламалари, қорағат, олча, олхўри каби нордон мевалардан тайёрланган шарбатлар ёз чилласининг энг хушхўр ва фойдали ичимликлари саналади. Айниқса, айрон, қатиқ, “окрошка” чанқоқни босиш билан бирга турли микроэлементлар билан организмни таъминлайди. Сабаби, улар орқали танамизга минерал моддалар ва витаминлар кириб боради.

Ёзда бодринг, селдерей, қовун, тарвуз, апельсин сингари табиат неъматларини истеъмол қилиб туриш танани сувсизланишдан сақлайди ва организмга тез сингиб кетади.

Хўш, иссиқ об ҳавода қандай ичимликлардан воз кечган маъқул?

Тонгни қаҳва билан бошлашни одат қилганлар кучли жазирама пайти бу ичимликдан воз кечиб туришлари саломатликлари учун фойда. Чунки қаҳва чанқоқни босмайди, аксинча таркибидаги кофеин қон босимини ошириб, танани сувсизлантиради.
Шунингдек, қадоқланган шарбатни, ширин газли ичимликларни ҳам таомномадан чиқариб ташлаш мавсумнинг муҳим тавсияларидан саналади. Сабаби улар таркибидаги кўп миқдордаги шакар ва консервантлар чанқоқни янада кучайтиради.

Муҳим эслатма!

Ёзда озиқ-овқат маҳсулотлари ва ичимликлар таркиби тез бузилишини инобатга олган ҳолда бозорларда, катта йўл четларида сотиладиган қўлбола ва яроқлилик муддати ўтган ичимликларни ичиш саломатлик учун хавф туғдиришини ёдда тутинг.

Кўп сув ичиш кимларга тавсия этилмайди?

Юрак-қон томир, буйрак хасталигидан азият чекувчи инсонларга эса кўп сув ичиш тавсия этилмайди. Бундай беморлар шифокор назорати остида суюқлик истеъмол қилиши лозим.