Bu qanday ishxona deysizmi? AQShdagi mashhur “911” xizmati haqida bilsangiz kerak, ushbu xizmat o'tgan yili yurtimizda ham yo'lga qo'yildi.

«112» yagona dispetcherlik xizmati turli davlat idoralarining favqulodda vaziyatlarini yagona tarmoqqa birlashtirib, shoshilinch yordam chaqiriqlarini qabul qilish va qayta ishlashni ta'minlaydi. Ushbu tizim Ichki ishlar, Favqulodda vaziyatlar, Sog'liqni saqlash vazirliklari, Ijtimoiy himoya milliy agentligi va “Hududgazta'minot” aktsiyadorlik jamiyati kabi muhim tashkilotlarning favqulodda xizmatlarini yagona platformada birlashtiradi.

«112» yagona dispetcherlik xizmati aholiga tezkor va samarali yordam ko'rsatishda muhim o'rin tutadi. Bugungi kunda markazda 1 551 nafar xodim mehnat qilayotgan bo'lsa, ularning 827 nafari xotin-qizlardir. Ular kunu tun fuqarolarning murojaatlarini qabul qilib, favqulodda vaziyatlarda tegishli idoralar bilan hamkorlikda yordam ko'rsatadi.

Yagona dispetcherlik xizmati fuqarolarning shoshilinch murojaatlarini qabul qilish va avtomatlashtirilgan tarzda qayta ishlash, tezkor yordam ko'rsatishni tashkil etish hamda vazirlik va idoralarning muvofiqlashgan holda ishlashini ta'minlash kabi vazifalarni bajaradi. Ushbu tizimning joriy etilishi qator afzalliklarni taqdim etadi.

Dispetcherlik markazi operatorlari yuksak mas'uliyat talab etuvchi kasb egalari hisoblanadi. Ular nafaqat qo'ng'iroqlarni qabul qilib murojaatlarni qayta ishlaydilar, balki inson hayoti uchun muhim qarorlarni ham qabul qilishga to'g'ri keladi.

Feruza Karimjonova markaz operatorlaridan biri. U sohaga bo'lgan sadoqati va fidokorona mehnati bilan ajralib turadi:

– Ko'p yillardan beri operator bo'lib ishlayman. Yagona dispetcherlik markazida mehnat qilib, qiyin holatga tushgan insonlarga yordam berganimdan faxrlanaman. Ishimiz turli hududlardan kelayotgan qo'ng'iroqlarga javob berish va tezkor yordamni ta'minlashdan iborat. Markazda ish uch smenada tashkil etilgan. Hatto bayram kunlari ham navbatimiz kelsa, ishga chiqishga tayyormiz. Sababi, aynan o'sha kunlarda murojaatlar soni ortib ketadi. Ishimni yaxshi ko'rganim uchun uning qiyinchiliklari sezilmaydi, aksincha, kimningdir muammosini hal qilganimdan mamnun bo'laman.

Feruza RAHIMOVA
Mirnodir MIRAKMALOV,
Diyorbek G'ANIEV
ishonch.uz