ishonch.uz ning bugungi qahramoni — Azizbek Zaylobiddinov, Toshkent xalqaro Vestminster universiteti qoshidagi akademik litseyning 2-bosqich o'quvchisi. U 17 yoshida IELTS imtihonidan 8, SAT imtihonidan 1520 ball to'plab, dunyoning eng nufuzli oliygohlaridan biri — Harvard universitetiga 100 foizlik (360 ming dollarlik) grant yutgan. Bugun uning yutug'i millionlab yoshlar uchun ilhom manbai bo'lib xizmat qilmoqda. Yaqinda u Prezidentimiz bilan uchrashish baxtiga muyassar bo'ldi.

Prezident bilan uchrashuv: ilhom va faxr

“2025 yil 14 fevral' mening hayotimda muhim sana bo'lib muhrlandi. Shu kuni davlatimiz rahbari biz, yoshlar bilan samimiy muloqot o'tkazdi. Uchrashuv davomida yoshlarga yaratilayotgan imkoniyatlar haqida eshitar ekanman, o'z mamlakatimning farzandi ekanimdan faxrlandim. Kelajagimiz bugungidan ham yorug' bo'lishiga ishonchim ortdi. Ayniqsa, ehtiyojmand oilalar farzandlarini chet elda o'qitish tashabbusi menda katta taassurot qoldirdi.”

Muhim qadamlar va mehnat ortidagi muvaffaqiyat

“Men 2007 yilda Farg'ona viloyatida tug'ilganman. Hozirda Toshkent xalqaro Vestminster universiteti qoshidagi akademik litseyda tahsil olyapman. Ortda qolgan 2024 yil men uchun unutilmas voqealarga boy bo'ldi. Dekabr' oyida Harvard universitetidan 360 ming AQSh dollari miqdoridagi grantni yutdim. Bu yutuq osonlikcha qo'lga kiritilmadi. Nufuzli oliygohlardan to'liq grant yutib olish uchun bilimning o'zi kamlik qiladi. Bu jarayonda nomzodlarning ijtimoiy faolligi ham katta ahamiyatga ega. Shu bois men ko'plab ijtimoiy loyihalarda faol qatnashdim.”

“Ibrat Debate” loyihasi va ijtimoiy faollik

“Hozirda Yoshlar ishlari agentligi tashabbusi bilan tashkil etilgan “Ibrat farzandlari”ning “Ibrat Debate” loyihasiga rahbarlik qilyapman. Loyihamizning asosiy maqsadi — ingliz tilini yaxshi biluvchi yoshlar orasida debatlar tashkil etish. Shu kunga qadar 100 ga yaqin debat o'tkazilib, ularda 3000 dan ortiq yoshlar ishtirok etdi. Loyihada 100 dan ziyod volontyorlar faoliyat yuritmoqda.”

Kelajakka intilish va maqsadlar

“Oldimga qo'ygan maqsadlarim ko'p. Ulardan eng asosiysi — nufuzli oliygohda ta'lim olib, orttirgan bilim va ko'nikmalarimni yurtimiz ravnaqi yo'lida ishlatish, tanlagan yo'nalishim — iqtisodiyotning rivojiga hissa qo'shish. Biz yoshlar birlashsak, ulkan kuchga aylanamiz. Bizdan talab etiladigani — bilimning qudratini vaqtida anglab, imkoniyatlardan unumli foydalanish va yutuqlarimizni yurt ravnaqiga sarflash.”

Azizbek Zaylobiddinovning muvaffaqiyati — izchillik, bilim va ijtimoiy faollik orqali katta natijalarga erishish mumkinligining yorqin namunasidir. Uning yutug'i nafaqat shaxsiy g'alaba, balki o'zbek yoshlari uchun yo'l xaritasi bo'lib xizmat qiladi.

Feruza Rahimova
Quvonch To'raev
Ishonch.uz