– Men dekret ta'tilidaman. Bir hamkasbim ishga chiqing, bo'lmasa 2-tug'uruqqa dekret puli berilmaydi dedi. Shu to'g'rimi, iltimos aniqlik kiritsangiz.
Nigora Olimova, Samarqand viloyati

Bu savolga mehnat huquqi bo'yicha ekspert Muhammadamin Karimjonov javob berdi.

– Bu mutlaqo asossiz!

Bola parvarishi ta'tili shunday ta'tilga ulanganda ham “dekret” puli beriladi. Farzandlar soniga ham hech qanday cheklov yo'q. Bunday vaziyatda takroriy homiladorlik uchun mehnatga layoqatsizlik varaqasi umumiy asosda berilaveradi. Ya'ni, xodim 1-farzandi uchun “dekret”ga chiqib, so'ng bola parvarish ta'tili davomida 2 va 3-farzandlari tug'ilsa ularga ham “dekret” to'lanaveradi.

Sog'liqni saqlash vazirining 2015 yil 20 martdagi buyrug'iga ilova tarzda “Mehnatga layoqatsizlik varaqalarini berish tartibi to'g'risida”gi Yo'riqnoma kiritilgan. Uning 29-bandiga ko'ra, bola ikki va uch yoshga to'lgunga qadar parvarishlash uchun beriladigan ta'til yoki ish haqi saqlanmagan holda qo'shimcha ta'tilda bo'lgan ayollarning takroriy homiladorligi uchun mehnatga layoqatsizlik varaqasi umumiy asosda beriladi.

Hisob-kitob qanday qilinadi? “Davlat ijtimoiy sug'urtasi bo'yicha nafaqalar tayinlash va to'lash tartibi to'g'risida” nizom bandlariga ko'ra, vaqtincha mehnatga qobiliyatsizlik, homiladorlik va tug'ish bo'yicha nafaqalar barcha hollarda xodimning haqiqiy ish haqidan hisoblab chiqariladi. Nafaqalarni hisoblashda asos qilib olinadigan haqiqiy ish haqiga ish joyidan, sug'urta badallari undirilib to'lanadigan jami ish haqi to'lovlari kiradi.

Nizomning 58-bandiga ko'ra, xodim uzrli sabablarga ko'ra ish haqiga ega bo'lmagan, qonunchilik hujjatlariga muvofiq ish haqidan nafaqa hisoblab chiqarilishi lozim bo'lgan hollarda nafaqa tarif stavkasi (lavozim maoshi) va mukofotlarning o'rtacha oylik summasidan kelib chiqqan holda hisoblab chiqarilishi lozim.

Bunda tarif stavkasi yoki eng kam ish haqi tuman koeffitsienti va ustamalar belgilangan joylarda ishlaganlik uchun beriladigan ustamalarni hisobga olgan holda asos qilib olinadi. Endi ikkinchi va undan keyingi farzandlar uchun “suyunchi puli” barchaga berilmaydi.

“Dekret puli hamda ”suyunchi puli” umuman boshqa narsalar, shuni unutmang!