Savol: Tibbiyot xodimiga mehnat vazifasini bajarayotgan vaqtida boshqa shaxslar tomonidan tan jarohati yetkazilishi mehnatda jarohatlanish hisoblanadimi?

Nigora Rahimjonova,
Toshkent viloyati

Savolga Sog'liqni saqlash xodimlari kasaba uyushmasi respublika kengashining Toshkent viloyati bo'yicha mehnat-texnik inspektori Jo'rabek Islombekov javob berdi.

O'zbekiston Respublikasi Vazirlar Mahkamasining 1997 yil 6 iyundagi 286-sonli “Ishlab chiqarishdagi baxtsiz hodisalarni va xodimlar salomatligining mehnat vazifalarini bajarish bilan bog'liq boshqa xil zararlanishini tekshirish va hisobga olish to'g'risidagi nizomni tasdiqlash haqida"gi qarorining I-bo'lim 2-bandida “Korxona hududida va uning tashqarisida mehnat vazifalarini bajarayotganda (shuningdek xizmat safarlarida) yuz bergan jarohatlanish, zaharlanish, issiqlik ta'siri, portlash, falokatlar, imoratlar, inshootlar va konstruktsiyalar buzilishi, kuyish, muzlash, qizish, elektr toki va yashin urishi, hayvonlar, hasharotlar va sudralib yuruvchilar tomonidan, terroristik harakatlar natijasida shikastlanishlar, shuningdek tabiiy ofatlar (zilzilalar, o'pirilishlar, suv toshqinlari, to'fonlar va boshqalar) tufayli salomatlikning boshqa xil shikastlanishlari;

Ichki ishlar organlarining ma'lumotlari asosida — ish vaqtida mehnat vazifalarini bajarayotganda boshqa shaxs tomonidan tan jarohati yetkazilgandagi;

Smenali dam olishda bo'lgan xodim bilan transport vositasidagi vaxta shaharchasi hududidagi yoki ijaraga olingan xonadagi (kuzatib boruvchi, refrijerator brigadasi xodimi, smenali haydovchi, dengiz va daryo kemalari xodimlari, shuningdek, vaxta-ekspeditsiya usulida ishlayotganlar va boshqalar) baxtsiz hodisalar tekshiriladi va hisobga olinadi” deb belgilab qo'yilgan.

Yuqoridagilarni inobatga olgan holda, tibbiyot xodimiga mehnat vazifasini bajarayotgan vaqtida boshqa shaxslar tomonidan tan jarohati yetkazilishi yuzasidan o'rnatilgan tartibda maxsus tekshiruv o'tkaziladi va rasmiylashtirilgan hujjatlar asosida mehnatda jabrlangan xodimga to'lanishi lozim bo'lgan barcha to'lovlar to'lab beriladi.