Yaqinda biz Toshkent shahar markazi, Mustaqillik maydoni ro'parasida joylashgan "Yoshlar ijod saroyi"da bo'lib, yoshlarimiz ishonchli qo'llarda ekaniga guvoh bo'ldik.

Tonggi soat 8:00dan tungi 23:00 gacha faoliyat yuritadigan saroy ayni paytda yoshlar, talabalar xizmatida. Tassavur qiling, mashhur Pena saroyiday hashamatli bir bino talabalar ixtiyoriga berib qo'yilsa... Bu juda ajoyib, shunday emasmi?

Kuzatuvlarimiz mobaynida yoshlar uchun bu bino allaqachon ikkinchi qadrdon uyga aylanganiga ishonch xosil qildik. Bu yerda yoshlar qulay jihozlarda kitob o'qishi, ovqatlanishi, til o'rganishi, turli qiziqarli to'garaklarda ishtirok etishi, erkin fikrlarini bildirishi va charchagan paytda hatto uxlashi mumkin. Ular istagan libosida binoga kirishi, bu yerga ovqat va kitoblarini ko'tarib kelishi, boshpanasiz qolgan vaqtda shu yerda tungi 23:00 gacha yashab turishi mumkin ekan. Qisqasi, yoshlar demokratiyasining yorqin ko'rinishi binoda hukm surmoqda.

Bugungi yoshlarning dunyoqarashi, tafakkuri avvalgilaridan keskin farq qiladi. Global asrda ularning mustaqil, qat'iyatli va sobit shaxs bo'lib shakllanishi uchun shubhasiz, sog'lom muhitga zarurat bor. Agar siz g'ala-g'ovur shovqinli shahar tashvishlaridan toliqsangiz va yoshlik xotirlarini yodga olish istagida bo'lsangiz, shunday muhit shakllangan ijod saroyiga albatta kelib keting...

Maftuna Karimova,
Quvonch To'raev,
"Ishonch.uz" muxbirlari