Peshtoqiga “Kitoblar, olib ketish, foydalanish va joyiga qaytarish” yorlig'i bitilgan “mo''jiza”ning ko'pchilikda qiziqish uyg'otgani ham bor gap. Ayniqsa, viloyatning yaqin va olis tumanlaridan, qishloqdan kelgan mijozlarning shahardagi yangilikdan og'izlari lang ochilib qolgani ham balki rostdir.



– Ochig'i keyingi o'n yilda manavini o'qi, deya qo'limga birov bir varaq qog'oz tutqazgani yo'q. Telefonga suyanib, osilib qoldik, – deydi toyloqlik F.Raximova. – Bank qoshidagi bu yangilik o'ziga tortdi. Savob ishni har kim ham qilavermaydi. Ko'p yillardan buyon kitob o'qimaganimdan uyaldim. Kel shu yerdan bitta kitob olib o'qib keyin keltirib qo'yarman-da, degan o'yda kitob tanladim. Ammo javondan joy olgan kitoblarning aksariga “tishim” o'tmadi. Asosan rus tilida, eski-tuski nashrlar.

– Nazarimda bank jamoasi boshlagan xayrli ishni oxiriga yetkazolmagan ko'rinadi, – deydi yana bir mijoz. – Bu yerda biz istagan, izlagan kitoblarning “arvohini” ham topib bo'lmaydi. Nazarimda bu ish shunchaki xo'jako'rsinchilik, “piar” uchun tashkil etilgandek...

Shov-shuvli voqelikning natijadorligini hafta mobaynida kuzatdik. Odamlarda kitob o'qishga qiziqish so'nib ketmagan ekan. O'nlab odamlarning bu “budka”ga bosh suqqaniga ko'zimiz tushdi. Ammo u yerdan kitob olib chiqayotgan yoki olib kelayotgan biror kishini uchratmadik. Javonlarda o'sha ilk ochilish kunlari joylangan, asosan ajnabiy tildagi kitoblarning taxi buzilmasdan turibdi. Biz uchun xarajat, harakat qilgan bankirlar tashabbusi chala qolgandek tuyuldi.

Nazarimizda, shundoq eshik tagida qo'qqayib turgan ma'rifat maskaniga “Ipak yo'li banki” Samarqand filiali ma'murlarining ko'zi tushmagan chog'i. Ko'rganlarida jamoaning bu tashabbusini qo'llagan, javonlarni yangi kitoblar bilan to'ldirishga ko'maklashgan, bank nomini tarixga muhrlashga hicca qo'shgan bo'lardi.

Nurilla Shamsiev,
Ishonch.uz