Абдувоҳиднинг футболкаси сотувга қўйилиши мумкин
Пойтахтимиздаги “Бунёдкор” стадионида футбол бўйича амалдаги чемпион жамоа Тошкентнинг “Пахтакор” ҳамда биллур кубок соҳиби Қаршининг “Насаф” клублари ўртасида мамлакат суперкубоги учун ўтган ўйин эсда қоларли ҳолатларга бой бўлди. Учрашувнинг биринчи бўлимида ҳисоб очилмади. Аммо иккинчи бўлимда томонлар биттадан тўп киритишди, ҳисоб-1:1.
Мусобақа низомига кўра, ғолиб пенальтилар сериясида аниқланиши лозим эди. Серияда томонларнинг тўртинчи зарбасидан кейин “Пахтакор” 3:2 ҳисобида олдинга чиқиб олди. “Насаф” бешинчи зарбани голга айлантира олмаса, тошкентликлар суперкубокка эга чиқишарди. “Насаф”дан тўп олдига дарвозабон Абдувоҳид Неъматов яқинлашди.
Дарвозабонлар “дуэли”да қаршилик посбоннинг қўли баланд келди. Унинг аниқ ва чиройли зарбасига ҳатто тошкентликлар посбони Павел Павлюченка ҳам тан берди. Голдан кейин у ҳамкасбининг қўлини сиқиб, табриклаб қўйди. Ҳисоб 3:3.
Олтинчи зарбани “Насаф”дан бразилиялик Виктор да Силва голга айлантирди 3:4. “Насаф” олдинга чиқиб олди. Абдувоҳид “Пахтакор”чи Муҳаммадқодир Ҳамралиев тепган тўпни ҳам моҳирлик билан қайтара олди. Шу тариқа учта пенальини қайтарган ва ўзи ҳам гол урган моҳир дарвозабон учрашувнинг энг яхши ўйинчиси деб топилди.
Бунгача “Пахтакор” ва “Насаф” мамлакат суперкубогини икки мартадан қўлга киритганди. Қашқадарё жамоаси учинчи марта ғолиб чиқиб, ўз даражасини ва салоҳиятини кўрсатди.Эътиборлиси, ўйин қаҳрамони Абдувоҳид Неъматов ғалабани яқиндагина дунёга келган фарзандига бағишлади.
Ўйиндан сўнг журналистлар Абдувоҳиднинг футболкасини аукционга қўйиш ва ундан тушган пулни болалар шифохонасига ўтказиш таклифини илгари суришди. Неъматов ҳам ўз навбатида бунга қарши эмаслигини билдирди.
Эслатиб ўтамиз, яқинда Қатардаги Осиё кубогида Ҳусайн Норчаев гол киритгандан сўнг уни нишонлашда кийган ўзбек дўпписи аукционда 50 миллион сўмга сотилиб, пули болалар шифохонасига ўтказилганди. Демак, ўзбек футболида ҳам ишқибозлар қалбини тўлқинлантира оладиган лаҳзалар, аукционга қўйишга арзигулик қадрдон буюмлар кўпаймоқда...
Акмал АБДИЕВ, ishonch.uz
Mақолага баҳо беринг
0/50
0
0
0
0