Спортда ғалаба ва мағлубият ёнма-ён юради, деган гап бор. Битта ҳаракатни ундай эмас, бундай бажариш, рақибнинг тактикасини англамаслик ортидан олтин кумушга, ёки кумуш олтинга айланиб кетиши мумкин. Ёки бўлмаса, спорт – бу пахта териш эмас. Катта пахтазорга бугун 10 нафар одамни киритиб юбориб, агар улар теришга улгурмаса, эртага яна 20 нафар одам қўшсангиз, бутун пахтазордаги ҳосил терилиши мумкин. Аммо спортнинг ўз чуқур илми бор.

Биз сўнгги олимпиададаги натижаларни йўқотиб қўймаслик, янада юксалтириш учун ана шу илмни пухта ўрганишимиз, эгаллашимиз лозим. Аввало, ҳар бир спортчи кучли тайёргарлик ва техникага эга бўлиши, тинимсиз ўз устида ишлаши билан бирга, юксак маънавиятга, кенг дунёқарашга эга бўлмоғи лозим. Сабаби, маънавияти юксак бўлмаган спортчи озгина ютуқларидан ҳаволаниб, кибрланиб кетади.

Биз Париж – 2024 олимпиадаси спорт юлдузларимизни ана шундай кибрланиб кетишидан асрашимиз зарур. Спорт кибрни ёқтирмайди. Қолаверса, кибрга берилган спортчи эътиборталаб бўлиб қолади. Маънавияти етарли бўлмагани туфайли ҳар хил кўча кучларининг таъсирига тушиши, ўз йўлидан оғишиб кетиши мумкин. Оқибатда олдинги юксак натижаларини такрорлолмай қолади, тезда “сўнади”.

Лос Анжелесдаги маррамиз – кучли ўнталикка кириш!

Жорий йил Францияда кечган Олимпиада совриндорларига Давлат мукофотларини топшириш жараёнида Президентимиз 2028 йилги Лос Анжелесда бўладиган мусобақаларда кучли ўнликдан жой олишимиз кераклиги, бунинг учун барча чора-тадбирлар, тайёргарликлар кўрилиши лозимлигини таъкидладилар. Албатта, бу жуда катта марра. Тасаввур қилинг, бу натижага эришиш учун биз камида Германия, Италия, Жанубий Корея каби давлатлардан бирининг натижаларидан ўзиб кетишимиз керак. Бу осон эмас.

Бунинг учун Диёра Келдиёрованинг ортида ҳудди унинг ўзи каби тиришқоқ, камида 5-6 нафар “Диёра”, яна 5-6 нафар Баҳодир Жалоловдек спортчиларимиз, ҳар бир йўналишда улар даражасида тайёрланган “ёниб турган” ақлан ва жисмонан кучли ёшларимиз керак.

Ҳозирданоқ халқаро даражадаги мусобақада қатнашишга муносиб спортчиларимизни саралаб, улар билан қандай ишлаш режасини тузиб, кучли тайёргарликни бошлашимиз лозим. Шу билан бирга, ҳар бир спорт йўналишида дунёдаги энг кучли спортчиларнинг, бўлажак рақибларнинг услуби, тактикасини диққат билан ақлан ва қалбан ўрганиб, кузатиб бориш мақсадга мувофиқ. Энг муҳими, спортчиларимиз охирги юксак натижаларига махлиё бўлиб қолмаслиги, ўзларини тинимсиз ривожлантириб боришлари зарур. Зеро, спорт хатоларни кечирмайди. У тинимсиз меҳнатни, етукликни талаб қилади.

Ҳамроқул Рофиев,
Ўзбекистонда хизмат кўрсатган ёшлар мураббийси,
спорт жонкуяри