“Акмал, финалга чиққанинг билан табриклайман”, дея ҳазиллашишарди Ўзбекистон бокс терма жамоасининг кўпчилик мураббийлари Акмал (у ҳам Ўзбекистон мураббийлар штабининг аъзоси) ўзи вақтинчалик секундантлик қилаётган қирғизистонлик боксчи финалга йўл олган жангни якунлаб, ринг тарафдан қайтаётганда.

Тақдир ҳазилини қарангки, ўзбекистонлик мураббий вақтинчалик секундантлик қилаётган қирғизистонлик боксчи энди финалда ўзбекистонлик чарм қўлқоп устаси билан жанг қилиши керак. Акмал Қирғизистон терма жамоасининг футболкасини кийиб, Қирғизистон вакили Мунарбекка мураббийлик қиладиган бўлди. Чунки боксчимизнинг секунданти йўқ эди. Бу жуда таъсирли ҳолат, чунки бир ўзбек мураббийи қирғизистонлик боксчининг финалда ўзбек боксчиси билан жанг қилиши учун кўмаклашди.

Мунарбек олимпиаданинг чорак финалида америкалик боксчи билан жанг ўтказаётганида секундант Акмал қирғизистонлик боксчига жанг тактикасини ўзбек тилида жўшиб тушунтиришга ҳаракат қилди. Ушбу ҳолат ижтимоий тармоқларда оммалашди ва видео остида қолдирилган изоҳлардан бирида кимдир шундай ёзди: “Қирғиз боксчиси секундантини тушундими?”

Бу саволга юзлаб жавоблар бўлди. “Биродар, хавотир олма, нафақат у, балки Мунарбекнинг барча юртдошлари ўзбек тилини жуда яхши тушунади...”

Мунарбек ярим финалда ғалаба қозониб, ёзги Олимпия ўйинлари олтин медали учун курашиш имкониятини қўлга киритганида, ўзбекистонлик мураббий ўз ҳис-туйғуларини жиловлай олмади – жойидан сакраб, Қирғизистоннинг расмий мураббийини қучоқлаб олди.

Видеолар остига ёзилган изоҳлар аллақачон алоҳида жанрга айланган ва улар кўпинча контентнинг ўзидан кўра қизиқарлироқ. Ўзбекистонлик мураббийнинг қирғизистонлик боксчининг ғалабасидан хурсанд бўлгани акс этган видеога изоҳларда кўпчилик ҳазиллашиб, “Акмал, финалда қайси бурчакда бўласан”, деб ёзмоқда.

Биласизми, бўлиб ўтган воқеалардан кейин финал жангида ким ғалаба қозониши муҳим эмас. Зеро, нима бўлганда ҳам, у қирғиз ё ўзбек бўлишидан қатъи назар, “бизнинг йигит” ғалаба қозонишини биламиз. Барчамиз ўз тилимизда гапирсак ҳам, бир-биримизни яхши тушунадиган минтақанинг йигитларидан бири ғолиб бўлади! Динимиз бир, еримиз бир ва ҳатто, ичадиган сувимиз ҳам умумий дарёларимиздан!

Нима бўлганда ҳам, қирғиз етиштирган гуручдан ўзбек тайёрлаган паловни ейдиган ёхуд Тошкентдаги қозоқ ресторанида бешбармоқ ейишни хуш кўрадиган йигит ғалаба қозонади. Ҳар қандай ҳолатда ҳам ғалабамиз – умумий!

Бутун Олимпиада давомида Қирғизистон, Қозоғистон ва Ўзбекистон халқларининг ҳақиқий бирдамлигини ҳис этдик. Мамлакатларимиз спортчиларининг ғалабалари ёки мағлубиятлари ҳақидаги хабарлар остида ҳамма бир-бирига табрик ё тасалли сўзларини ёзмоқда.

Деярли барча изоҳларда шунчаки қўшнилар эмас, аслида эътиқоди, тили ва маданияти бир бўлган шу уч давлатнинг байроқларига кўзимиз тушади.

Ўзбекистонлик мураббий қирғизистонлик боксчининг ғалабасидан ўзи ютгандек чин дилдан қувонди, қозоғистонлик спортчилар телевизор орқали Акжўлни олқишлади, қирғизистонлик мухлислар эса Диёранинг дзюдодаги олтинидан ўзбекистонликлардан кам қувонгани йўқ.

Илк марта спорт бу уч мамлакат аҳолисини ажратмади, аксинча, бирлашишига муносиб ҳисса қўшди.

Одамлар узоқ вақтдан бери бир-бирларининг ютуқларидан бу қадар хурсанд бўлишлари учун арзигулик сабаб топа олмаётган эди. Аслида, биз бир-биримизга ўйлаганимиздан-да кўпроқ меҳрибон ва яқинроқмиз.