Savol: Qanday hollarda xodimning roziligidan qat'i nazar, mehnat haqidan ushlab qolishga yo'l qo'yiladi?

Javob: Amaldagi qonunchilikka muvofiq umumiy qoidaga ko'ra, xodimning yozma roziligi bilan, bunday rozilik bo'lmagan taqdirda esa, sudning qaroriga asosan mehnat haqidan ushlab qolinishi mumkin.

Lekin Mehnat kodeksining 164-moddasiga asosan xodimning roziligidan qat'i nazar, mehnat haqidan ushlab qolinishi mumkin bo'lgan holatlar keltirilgan.

Bular quyidagilar:

1) soliqlar va boshqa majburiy to'lovlarni undirish uchun;

2) sudning qarorlari va boshqa ijro hujjatlarini ijro etish uchun;

3) ish haqi hisobiga berilgan avansni ushlab qolish uchun, xo'jalik ehtiyojlariga, xizmat safarlariga yoki boshqa joydagi ishga o'tganligi munosabati bilan berilgan bo'lib, sarf qilinmay qolgan va o'z vaqtida qaytarilmagan avansni ushlab qolish uchun hamda hisob-kitobdagi xatolar natijasida ortiqcha to'langan summani qaytarib olish uchun;

4) hisobidan xodim ta'til olib bo'lgan ish yili tugamasdan turib mehnat shartnomasi bekor qilinganda;

5) xodim tomonidan ish beruvchiga yetkazilgan zararni qoplash uchun, agar yetkazilgan zararning miqdori xodimning o'rtacha oylik ish haqidan ortiq bo'lmasa;

6) Mehnat kodeksning 181-moddasi nazarda tutilgan jarimani undirish uchun.

Ish haqini har gal to'lash vaqtida ushlab qolinadigan haqning umumiy miqdori xodimga tegishli bo'lgan mehnat haqining ellik foizidan ortib ketmasligi lozim.