Mayda bezorilik, ya'ni jamoat joylarida uyatli so'zlar bilan so'kinish, fuqarolarga haqoratomuz shilqimlik qilish hamda jamoat tartibini va fuqarolarning osoyishtaligini buzuvchi shu kabi boshqa xatti-harakatlarda ifodalangan jamiyatda yurish-turish qoidalarini qasddan mensimaslik ma'muriy javobgarlikka tortish uchun asos bo'ladi.

O'zbekiston Respublikasining ma'muriy javobgarlik to'g'risidagi kodeksining 183-moddasiga asosan yuqoridagi huquqbuzarlikni sodir etish bazaviy hisoblash miqdorining uch baravaridan besh baravarigacha miqdorda jarima solishga yoki o'n besh sutkagacha muddatga ma'muriy qamoqqa olishga sabab bo'ladi.

Ushbu kodeksning 29-moddasi 2-qismiga binoan ma'muriy qamoqqa olish chorasi homilador ayollarga, uch yoshgacha bolasi bo'lgan ayollarga, o'n to'rt yoshgacha bo'lgan bolasini yakka o'zi tarbiyalayotgan shaxslarga, o'n sakkiz yoshga to'lmagan shaxslarga, birinchi va ikkinchi guruh nogironligi bo'lgan shaxslarga nisbatan qo'llanilishi mumkin emas.

O'zbekiston Respublikasi Oliy sudi Plenumining 2018 yil 30 noyabrdagi 35-son «Sudlar tomonidan ma'muriy huquqbuzarlik to'g'risidagi ishlarni ko'rishni tartibga soluvchi qonunlarni qo'llashning ayrim masalalari to'g'risida»gi Qarorining 24-bandiga muvofiq sudlarning e'tibori shunga qaratilsinki, qamoqqa olish tariqasidagi ma'muriy jazo qo'llanilishiga alohida hollarda yo'l qo'yiladi.

Demak, qonunchilikda mayda bezorilik uchun faqat ma'muriy qamoq emas balki jarima jazosi ham qo'llanilishi, qamoqqa olish tariqasidagi ma'muriy jazo qo'llanilishiga alohida hollardagina yo'l qo'yilishi mumkinligi qayd etilgan.