So'rovnoma tahlillariga ko'ra, bugungi kunda O'zbekiston mehnat bozorida savdo sohasi, xususan, onlayn savdo sohasida mutaxassislarga talab juda yuqori.

Misol uchun, so'rovda qatnashgan ish beruvchilarning katta qismi (23,4 foizi) savdo sohasida faoliyat yuritishini bildirgan.
Ma'lumot uchun, respublikadagi jami korxonalar orasida savdo korxonalarining ulushi eng yuqori bo'lib, bu 32,5 foizni tashkil etadi. Ushbu ko'rsatkich esa o'z navbatida aynan savdo sohasi mutaxassislariga talab yuqoriligini asoslaydi.

Keyingi o'rinda esa qishloq xo'jaligi va sanoat sohasi mutaxassislari joy olgan. Jumladan, so'rovnoma yakunida qishloq xo'jaligi va sanoat uskunalari mexanigi (1,7 foiz), qishloq xo'jaligi va qurilish texnikasi mutaxassislari (1,4 foiz), traktor, buldozer, kombayn haydovchilari (1,4 foiz), agronomlar (1,3 foiz), kashtachi, tikuvchi va to'quvchilarga ham talab yuqoriligi (1,7 foiz) oydinlashgan.

Shuningdek, ta'lim muassasalarida xorijiy tillar (ingliz, nemis, koreys va boshqa chet tillar), matematika va IT o'qituvchilariga (1,2 foiz) ham talab bor.

Tahlillarga ko'ra, hozirgi kunda davlat sektori va xususiy sektorga tegishli korxonalarda marketolog, IT dasturchilari, buxgalterlar, kadrlar bilan ishlash bo'yicha xodimlarga talab sezilarli darajaga yetgan.

Malaka talab etilmaydigan farrosh, haydovchi va bog'bonlarga ham talab yuqori ekanligi aniqlangan.

“Buni ular orasida qo'nimsizlik darajasi yuqoriligi bilan izohlash mumkin”, deyiladi tahliliy ma'lumotda.

MHTI ekspertlari respublika miqyosida 172 turdagi mutaxassisliklarga talab borligini aytar ekan, hududlar kesimida ayrim turdagi mutaxassislarga talab umuman yo'qligi ta'kidlaydi.