Ko'pchilik bir umr boshqalarni boy qilish uchun ishlaganini juda kech tushunadi. Natijada o'zini hech qachon badavlat bo'lolmaydigan muhtoj odamdek his etib, barcha istaklarini noaniq muddatga ortga suradi.

Devid Baxning "Latte omili" asaridagi bosh qahramon ham «qurbim yetmaydi» deya ko'p narsada, hatto orzularida ham o'ziga cheklovlar qo'ygan. U tasodifan tanishib qolgan keksa barisa esa qizga o'zi o'ylaganidan ancha badavlatroq ekanini tushuntirib beradi.

Asarning bosh qahramonlari — Zoi, Henri va Barbara. Syujetning asosiy qismi ularning suhbatidan tashkil topgan. “Latte omili” Zoi ismli qiz haqida. U onasining vafot etishidan bir necha oy avval afsus-nadomatlarsiz, baxtli yashashni istashini aytib suhbatlashadi. Mana shu hikoya muallifning buvisi Rouz Bax bilan bo'lgan so'nggi suhbatga asoslangan. Rouz Bax aytib bergan hikoya Devid Baxning keyingi hayotini butunlay o'zgartirib yuboradi. Muallifning yozishicha, uning buvisi tirishqoq, ajoyib ayol bo'lgan. 30 yoshida butun oilaning taqdirini o'zgartirib yuboradigan qaror qabul qiladi. Muallif, taniqli moliyaviy tahlilchi, moliyaviy erkinlikning uchta asosiy omilini ko'rsatib beradi. Ma'lum bo'lishicha, hamma narsa juda oson va sodda, va eng muhimi - bu omillarning barchasi ishlaydi! Siz qilishingiz kerak bo'lgan narsa - kundalik vazifalaringizni biroz o'zgartirish va allaqachon o'zingiz xohlagan narsaga pul tejabgina qolmasdan, balki sarmoya kiritishni ham boshlashingiz mumkinligi haqida so'z boradi.

Rouz Bax nabirasi Devid Baxga beradigan eng katta maslahati: hech nimadan afsuslanmay, tavakkal qilishi kerak ekanini uqtiradi. Buvisi o'limi oldidan shunday nasihat qiladi: "Yodingda bo'lsin, qay yo'ldan yurishni bilmay, chorrahada turib qolsang, ichingda ikkita ovozni eshitasan: birinchisi, katta odamning tovushi – “xavfsiz yo'lni tanla, o'zingni xatarga otma!”, deydi. Ikkinchisi yosh bola “Mana bu yo'ldan yur, Devid, bu qiziq bo'ladi. Kel. Harakat qilib ko'ramiz!”, deya undaydi. Ichingdagi mana shu qiziqqon va o'ynagisi kelgan bolakayning so'zlariga quloq tut. Uning tashqariga chiqib o'ynashiga qo'yib ber. Do'stlaringga ham shunday maslahat ber”.

Mablag'ni nazorat qilish va moliyaviy erkinlikla erishishni istagan barchaga ushbu asarni tavsiya qilaman.

Mahmudaxon ABDUSALOMOVA
Toshkent davlat o'zbek tili va adabiyoti universiteti
2-bosqich talabasi