“Ayollar daftari” va “Yoshlar daftari” orqali ijtimoiy yordamlar “Kambag'al oilalar reestri”ga kirgan oilalarga ko'rsatilishi belgilanmoqda. Bunda mablag'larni tuman va shaharlardagi aholi, nogiron shaxslar va kambag'al oilalar soniga mutanosib ravishda taqsimlash tartibi joriy etilmoqda.

Qayd etilishicha, oilaning kambag'al deb e'tirof etilishi uning a'zolaridan qo'shimcha ariza va hujjatlarni talab etmagan holda ijtimoiy yordamlar ko'rsatilishiga asos bo'ladi.

Shu bilan birga, samarasiz va talab yuqori bo'lmagan ijtimoiy yordamlar maqbullashtirilib, 28 turdagi ijtimoiy yordamning yagona ro'yxati tasdiqlanadi. Ijtimoiy daftarlar hisobidan ajratiladigan davolanish va jarrohlik amaliyoti xarajatlarini Davlat tibbiy sug'urta jamg'armasi orqali moliyalashtirish tartibi joriy etiladi.

Tuman (shahar) hokimliklari huzurida yuridik shaxs bo'lmagan “Infratuzilma va ijtimoiy barqarorlik” jamg'armalari tashkil etiladi. Uning mablag'lari hududdagi ijtimoiy-iqtisodiy, tashkiliy-amaliy va infratuzilmaviy muammolarini bartaraf etish, sog'lom turmush tarzini keng tatbiq etish va sportni rivojlantirish, ekologiya va atrof-muhitni asrash tadbirlariga sarflanadi.

Ta'kidlanishicha, oilaning ijtimoiy-iqtisodiy holati, daromadi va mulkni baholaydigan “Kambag'al oilalar reestri” axborot tizimi asosida, 48 ming fuqaro ishga joylashtirilgan, 10 mingdan ziyodi kasbga o'qitilgan, 14 ming nafariga kredit va subsidiyalar ajratilgan. Shu bilan birga 140 ming oilaga shifokorlar biriktirilgan, 38 ming fuqaroga ijtimoiy xizmatlar ko'rsatilgan. 32 ming bola bog'chaga joylashtirilib, qariyb 7 ming yoshlar kirish imtihoniga tayyorlash uchun universitetlarga biriktirilgan.

Davlat rahbari bildirilgan takliflarni ma'qullab, kambag'allik reestrini oilalarning mehnatga layoqatiga qarab tabaqalashtirish, mehnatga layoqatli bo'lmaganlarni davlat ijtimoiy himoyasiga olish, ularni ijtimoiylashtirish bo'yicha ko'rsatmalar berdi.